Заманауи энергия тиімді жабдықтарды қолдана отырып, шыны ыдыс өндіру зауытын салу.
«Багдар LTD» ЖШС Алматы қаласының Алатау ауданы Индустриялық аймағында шыны ыдыс өндіру зауытын салу жобасын іске асырды. Кәсіпорынның өндірістік қуаттылығы тәулігіне 80 тонна дайын өнімді құрайды, ал өндірістік үй-жайлардың жалпы ауданы 3 160 шаршы метр.
Жобаның жалпы инвестициялық құны 4,8 млн АҚШ долларын құрады. Қаражат еуропалық өндірушінің заманауи өндірістік, орау және компрессорлық жабдықтарын сатып алу мен орнатуға бағытталды.
Жобаның маңызды ерекшелігі – бастапқы шикізатты өндірудің орнына пайдаланылған шыны ыдысты шикізат ретінде қолдануға мүмкіндік беретін жоғары тиімді технологияларды енгізу. Бұл тәсіл циркулярлық экономика қағидаттарына сәйкес келеді: пайдаланылған шыны жиналып, шыны сынығына өңделеді және жаңа өнім өндіруде қолданылады.
Қайталама шикізатты пайдалану шыны балқыту кезінде энергия тұтынуды әрбір 10% үлесі артқан сайын 2,5–3%-ға төмендетеді және жыл сайын 10 мың тоннаға дейін материалды үнемдеуді қамтамасыз етеді.
Жоба «Шинхан Банк Қазақстан» АҚ қаржыландыруымен және ЕҚДБ-ның жасыл технологияларды қаржыландыруға бағытталған GEFF бағдарламасының қолдауымен жүзеге асырылды.
Жобаны іске асыру жаңа өнеркәсіптік өндірісті құруға, ішкі нарықта сапалы шыны қаптама көлемін арттыруға, сондай-ақ өндірістік үдерістерге энергия тиімді технологиялар мен циркулярлық экономика қағидаттарын енгізуге мүмкіндік берді.
Supported by:
