Европа реконструкциялоо жана өнүктүрүү банкы (ЕРӨБ) Кыргыз Республикасынын ири банктарынын бири болгон «Демир Кыргыз Интернэшнл Банкка» (Demir Bank) 25 миллион АКШ долларына чейин (21,5 миллион евро) каржылоо бөлүп берүүдө. Бул каражат өлкөдө сооданы өнүктүрүүгө жана жашыл инновацияларды жайылтууга багытталган.

ЕРӨБдүн каржылоо пакети төмөнкү компоненттерди камтыйт:

• Кыргыз Республикасындагы Жашыл экономика каржылоо механизминин (KyrSEFF III) алкагында Demir Bankка 20 миллион АКШ долларына чейин (17,2 миллион евро) улук кредит берилет. Бул каражаттар климаттын өзгөрүшүнүн таасирине дуушар болгон өлкөдө сооданы өнүктүрүүгө жана курч экологиялык көйгөйлөрдү чечүүгө көмөктөшөт. Каржылоо АКШ долларында жана синтетикалык улуттук валютада (кыргыз сому) жеткиликтүү болот. Ал жергиликтүү бизнеске жана үй чарбаларына климаттын өзгөрүшүнө туруктуулукту жогорулатууга, булганууну азайтууга жана суу ресурстарын туруктуу пайдаланууга жардам берет.

• Сооданы колдоо программасынын (Trade Facilitation Programme, TFP) алкагында сооданы каржылоо лимити 5 миллион АКШ долларына чейин (4,3 миллион евро) көбөйтүлөт. Бул жеке ата мекендик компанияларга керектүү товарларды, кызматтарды жана жабдууларды импорттоого, ошондой эле өз продукцияларын экспорттоого мүмкүнчүлүк берет.

Сооданы колдоо программасы (TFP) ЕРӨБ иш алып барган өлкөлөрдө, анын ичинде Кыргызстанда эл аралык сооданы өнүктүрүүгө көмөктөшөт. ЕРӨБ жергиликтүү банктардын бүтүмдөрүн колдоп, чет өлкөлүк банктарга кепилдик берет жана тышкы соода операциялары боюнча төлөмдөрдүн тобокелдиктерин азайтат.

«Демир Кыргыз Интернэшнл Банк» Кыргыз Республикасында чет өлкөлүк капиталдын катышуусу менен түзүлгөн биринчи банк болуп саналат жана 1997-жылдан бери ЕРӨБдүн кардары болуп келет.

ЕРӨБ Кыргызстанда 1992-жылдан бери иштеп келет. Уюм ушул мезгил ичинде негизинен туруктуу инфраструктурага жана жеке секторго багытталган 287 долбоорго болжол менен 1,16 миллиард евро инвестиция салган.