Санаи 28 ноябр маросими тантанавӣ бахшида ба ҷамъбасти бомуваффақияти марҳилаи аввали барномаи GEFF II Тоҷикистон – «Қарзҳои сабз» баргузор гардид, ки дар ҷараёни он кормандони фаъоли Бонки сармоягузорӣ ва қарзии Тоҷикистон (ICB) барои саҳмгузорӣ ва заҳмату талошҳояшон дар татбиқи лоиҳа қадрдонӣ карда шуданд.
Маросими қадрдонӣ аз ҷониби дастаи GEFF II Тоҷикистон дар бинои Бонки сармоягузорӣ ва қарзии Тоҷикистон баргузор гардида, марҳилаи муҳими ҷамъбасти натиҷаҳои ҳамкорӣ дар доираи барномаи маблағгузории сабз ба ҳисоб мерафт. Дар рафти чорабинӣ ғолибони номинатсияи «Коршиносони беҳтарини қарзӣ» эълон гардиданд — мутахассисоне, ки дар пешбурди қарзҳои сабз ва татбиқи қарорҳои каммасрафи энергия ва аз ҷиҳати экологӣ устувор саҳми назаррас гузоштаанд.
Ғолибон чунин муайян гардиданд:
• Ҷойи аввал — Сайдмумин Саидов, коршиноси қарзии филиали бонк дар шаҳри Бохтар;
• Ҷойи дуюм — Фируз Валичонзода, коршиноси қарзии филиали бонк дар шаҳри Хуҷанд;
• Ҷойи сеюм — Раҳим Рустамзода, коршиноси қарзии маркази хизматрасонии бонкии шаҳри Конибодом.
Қадрдонии ғолибон нишонаи эътирофи касбият, масъулият ва саҳми назарраси онҳо дар татбиқи бомуваффақияти барномаи GEFF II Тоҷикистон ва густариши дастрасӣ ба маблағгузории сабз барои мизоҷон мебошад.
Бонки сармоягузорӣ ва қарзии Тоҷикистон ба кормандони худ барои иштироки фаъол дар татбиқи ин лоиҳа, ки дар ҳамкорӣ бо Бонки аврупоии таҷдид ва рушд (ЕБРР) амалӣ мегардад, изҳори сипос намуда, талошҳои дастаҷамъонаро дар самти пешбурди ҳадафҳои бонк вобаста ба қарзҳои сабз баланд арзёбӣ кард.
Барномаи GEFF II Тоҷикистон  на танҳо як марҳилаи муҳим дар рушди низоми бонкӣ ба ҳисоб меравад, балки ба рушди устувор ва таҳкими заминаи экологӣ ва иқтисодии кишвар низ саҳми арзанда мегузорад.