2 ва 7 майи соли 2026 дар қитъаи намоишии Хоҷагии деҳқонии фермерии «Танзила», воқеъ дар ноҳияи Вахши вилояти Хатлон, барои мизоҷон ва шарикони Бонки Арванд ва Бонки Сармоягузорӣ ва Қарзии Тоҷикистон Рӯзҳои дарҳои кушод баргузор гардиданд, ки дар доираи барномаи GEFF II Тоҷикистон ташкил карда шуданд. Ҳадафи чорабиниҳо баланд бардоштани сатҳи маъломоти деҳқонон оид ба имкониятҳои маблағгузории сабз ва технологияҳои муосири устувори кишоварзӣ барои баланд бардоштани маҳсулнокӣ ва истифодаи самараноки захираҳо буд.

Дар чорабиниҳо деҳқонон, инчунин мизоҷони амалкунанда ва эҳтимолии бонкҳо иштирок намуданд. Дар қисми назариявӣ иштирокчиён бо воситаҳои маблағгузории сабз, шартҳои дастрасӣ ба технологияҳои аз ҷиҳати экологӣ устувор, инчунин имкониятҳои дастгирии машваратӣ ва техникӣ дар доираи GEFF II Тоҷикистон шинос шуданд.

Қисми амалии чорабинӣ бевосита дар қитъаи намоишӣ баргузор гардида, дар он ҷо роҳҳалҳои муосири соҳаи кишоварзӣ муаррифӣ шуданд, аз ҷумла системаҳои обёрии қатрагӣ ва фертигатсия, кишоварзии амудӣ, панелҳои офтобӣ ва дигар технологияҳо дар асоси манбаъҳои барқароршавандаи нерӯи, дастгоҳҳои биогазӣ, био-нуриҳо, технологияҳои муосири гармхонагӣ ва ҳалли рақамӣ барои соҳаи кишоварзӣ.

Қитъаи намоишии «Танзила» ба майдони мубодилаи таҷриба ва намоиши амалии он табдил ёфт, ки чӣ гуна технологияҳои инноватсионӣ ва сарфакунандаи захираҳо метавонанд ба рушди самаранок ва устувори соҳаи кишоварзӣ мусоидат намоянд.

Рӯзҳои дарҳои кушод бо иштироки ташкилотҳои молиявии шарики GEFF II Тоҷикистон ба рушди донишҳои амалӣ миёни деҳқонон ва соҳибкорон, инчунин ба васеъ намудани дастрасӣ ба технологияҳои муосири сабз ва маблағгузории роҳҳалҳои устувор дар бахши аграрии Тоҷикистон равона шудаанд.

Барномаи GEFF II Тоҷикистон бо дастгирии Фонди иқлими сабз (GCF), Вазорати молияи Австрия ва Ҷумҳурии Корея тавассути Бонки Аврупоии Таҷдид ва Рушд (EBRD) амалӣ гардида, ҳадафи он васеъ намудани дастрасӣ ба маблағгузории сабз ва технологияҳои муосири ба иқлим устувор дар Тоҷикистон мебошад.