Дар шаҳри Душанбе дар доираи барномаи GEFF II Тоҷикистон тренинги омӯзишӣ барои коршиносони қарзии Бонки Ҳумо аз шаҳри Душанбе ва ноҳияҳои тобеи ҷумҳурӣ  баргузор гардид.
Дар тренинг 15 нафар корманди бонк, аз ҷумла 4 зан, иштирок намуданд, ки ин аз афзоиши ҷалби мутахассисони зан ба рушди маблағгузории сабз ва қарорҳои устувори бонкӣ шаҳодат медиҳад.
Тренингро мушовирони барномаи GEFF II Тоҷикистон— Зарина Ачилова, Садриддин Ҷураев, Мирзокурбон Почоев ва Парвин Ҷабборов баргузор намуда, ба иштирокчиён ҳадафҳо ва абзорҳои асосии барномаи GEFF II Тоҷикистон, рӯйхати технологияҳои афзалиятноки сабз ва механизмҳои дастгирии грантиро муаррифӣ карданд.
Дар ҷараёни омӯзиш ба масъалаҳои амалии фаъолияти коршиносони қарзӣ, аз ҷумла арзёбии лоиҳаҳо дар соҳаи самаранокии энергетикӣ ва манбаъҳои барқароршавандаи энергия, ҳамкорӣ бо мизоҷон ва пешбурди маҳсулоти қарзии сабз дар сатҳи минтақаҳо таваҷҷуҳи махсус зоҳир карда шуд.
Барномаи GEFF II Тоҷикистон бо дастгирии Бонки аврупоии таҷдид ва рушд (ЕБРР), Фонди иқлимии сабз (GCF), Вазорати молияи Австрия ва Ҷумҳурии Корея амалӣ гардида, ба густариши дастрасӣ ба маблағгузории устувор ва таҳкими иқтидори муассисаҳои молиявӣ дар соҳаи иқтисоди сабз мусоидат менамояд.
Гузаронидани чунин тренингҳо ҷузъи муҳими баланд бардоштани сатҳи тахассусии мутахассисони бонкӣ ва таҳкими ҳамкории GEFF II бо муассисаҳои молиявӣ дар пешбурди рушди устувор дар Тоҷикистон мебошад.