Бо дастгирии лоиҳаи GEFF Тоҷикистон, деҳқонзани тоҷик ба трактори нави каммасраф сармоягузорӣ намуд

Деҳқонзани точик аз деҳаи Сангобаи ноҳияи Носири Хусрав ба трактори нави тамғаи МТЗ 82.2 сармоягузорӣ намуд, ки нисбат ба трактори пешинааш 20% сӯзишвориро камтар сарф мекунад.

Масхол Боймуродова бо 8 аъзои оилаи худ дар хоҷагиаш, ки 3 га масоҳат дорад, кор мекунад ва ба таври иловагӣ 2 гектари дигарро ба иҷора мегирад. Онҳо зироатҳои гуногун, пиёз, пахта, ҷуворимакка ва гандум парвариш менамоянд. Фасли тобистон пиёз ва дар тирамоҳ ҷуворимакка ва пахта мефурӯшад.

Шавҳари Масхол Боймуродова тракторчӣ буда, дар хоҷагӣ низ кор мекунад. Ғайр аз ин, вай ба хоҷагиҳои ҳамсоя хизматрасониро пешниҳод мекунад. Бо гузашти солҳо, трактори онҳо фарсуда шуд ва зарурати харидани трактори нави каммасраф ба миён омад. Аз сабаби пандемияи Ковид-19, одамон бинобар маҳдудиятҳо, нисбат ба пештара камтар ба саҳро мераванд. Механизатсия дар баробари таъмин намудани ҳосилнокии баланд, талабот ба меҳнати дастиро кам менамояд.

Бо ин мақсад Масхол Боймуродова ба яке аз бонкҳои шарики Бонки Аврупоии Таҷдид ва Рушд (БАТР) барои гирифтани қарзи GEFF ба маблағи 19700 доллари ИМА муроҷиат карда, ба трактори нави каммасрафи MTZ 80.1 сармоягузорӣ кард. Трактори кӯҳна барои шудгори заминҳо дар як сол тақрибан 23550 литр сӯзишвории дизелӣ сарф мекард ва трактори нав тақрибан 19628 литр. Баланд бардоштани самаранокии сӯзишвории трактор боиси 20% кам шудани истеъмоли дизел мегардад.

Мавҷудияти ҳавасмандкунии грантӣ аз ҷониби Иттиҳоди Аврупо (ИА) дар ҳаҷми 30% имкон медиҳад, ки маблағгузорӣ барои деҳқонон дастрас бошад.

«Бо трактори нав, мо метавонем бисер корҳоро бо зудӣ ва харҷи камтар анҷом диҳем, самаранокӣ бешубҳа афзоиш ёфт. Инчунин, расонидани хизматрасонӣ ба хоҷагиҳои ҳамсоя даромади иловагӣ меорад. Дар оянда, бо дастгирии лоиҳаи GEFF, нақша дорам боркунак низ харидорӣ намоем», изҳор дошт Масхол Боймуродова.

Лоиҳаи GEFF Тоҷикистон аз ҷониби Иттиҳоди Аврупо, Хазинаи Иқлими Сабз ва Кореяи Ҷанубӣ дастгирӣ карда мешавад.

GEFF Тоҷикистон [Занҷираҳои арзиши иловашуда дар соҳаи кишоварзӣ] ба деҳқонон ва агробизнеси тоҷик барои дар амал ҷорӣ намудани технологияҳои муосир, ки рақобатпазирии занҷираҳои истеҳсолотро дар соҳаи кишоварзӣ афзоиш медиҳанд, кӯмак мерасонад. Барнома фаъолиятҳои марбут ба гендерро, ки ба фароҳам овардани имкониятҳои баробарии занон ва мардон дар дастрасӣ ба маблағгузорӣ барои технологияҳои сабз равона шудааст, дастгирӣ мекунад.