ՖՎ վահանակների արտադրության ընդլայնում՝ Հայաստանում կայուն աճ ապահովելու համար

2019-ին Երևանում հիմնադրվեց Լա Սոլար ՍՊԸ-ն, որը ձեռնամուխ եղավ արևային բարձրորակ ՖՎ վահանակների արտադրությանը՝ դարձնելով այն իր գործունեության հիմնական ուղղվածությունը։ Գործարանը, որն աշխատում է տարեկան 350 ՄՎտ արտադրական հզորությամբ՝ արտադրում է 340 Վտ-ից մինչև 550 Վտ հզորությամբ ՖՎ վահանակներ։ Յուրաքանչյուր արտադրված հասարակ վահանակ հանդիսանում է սերտիֆիկացված «գլուխգործոց», որը համապատասխանում է որակի ամենաժամանակակից չափանիշներին, ապահովում է հուսալիություն և բարձր արդյունավետություն:

Ընկերության կողմից իրականացված մանրակրկիտ փորձարկումները երաշխավորել են, որ  այդ վահանակներն արտահանվեն ավելի քան 40  երկիր՝ ԱՄՆ-ից մինչև ԵՄ և ԱՊՀ երկրներ:

Իր արտադրական հնարավորություններն ավելի ընդլայնելու համար Լա Սոլար ՍՊԸ-ն ներկայումս գտնվում է նոր գործարանի կառուցման գործընթացում, որը կզբաղվի միայն ՖՎ վահանակների ալյումինե շրջանակների արտադրությամբ։ Բացի այդ, ընկերությունը հավակնոտ ծրագրեր ունի գալիք տարում ներդնել նորարարական «Արևային տանիք» մոդուլների արտադրություն:

Որպես իրենց ընդլայնման ծրագրերի մաս, Լա Սոլար ՍՊԸ-ն ձեռք բերեց շրջանառու միջոցներ՝ գնելով 12,000 հատ 450 Վտ հզորությամբ ՖՎ վահանակների արտադրության նյութեր՝ GEFF-ի հայաստանյան գործընկեր ֆինանսական կառույցներից մեկի ֆինանսավորման միջոցով: Այս ռազմավարական քայլը նրանց հնարավորություն կտա արտադրել 5,4 ՄՎտ ընդհանուր հզորությամբ ՖՎ վահանակներ:

Այս ներդրման արդյունքը գնահատելու նպատակով պոտենցիալ վերջնական օգտագործողների համար իրականացվել է բնապահպանական և ֆինանսական օգուտների գնահատում։ Ելնելով Հայաստանում GEFF-ի կողմից ֆինանսավորված կայանների, ինչպես նաև նմանատիպ ներդրումների վիճակագրությունից՝ սեփական օգտագործման ՖՎ կայանների տեղադրման արդյունքում ձեռք բերված միջին էներգախնայողությունը կազմում է մոտավորապես 63%: Այս տվյալների համաձայն ընկերության ներդրումները ՖՎ վահանակներում կհանգեցնեն տարեկան 2,543 տոննա ածխաթթու գազի արտանետումների կրճատմանը։ Ավելին, օգտագործողները  կունենան էլեկտրաէներգիայի զգալի խնայողություններ, որոնք կկազմեն տարեկան 7,500 ՄՎտժ, ինչը նշանակում է տարեկան ավելի քան 900,000 ԱՄՆ դոլար խնայողություն:

Լա Սոլար ՍՊԸ-ի նմանատիպ գործունեությունը տալիս է ոչ միայն ֆինանսական օգուտներ, այլ նաև ապահովում է  նորարարության ներդրում և կայուն զարգացում ապագայում։

Ծրագրի իրականացմանն աջակցել են Կանաչ Կլիմայի Հիմնադրամը (GCF) և Կլիմայի Ներդրումային Ֆոնդերը (CIF):